اسرار منحنى الرمايه فى الضرب على الاهداف الغير افقيه

يعنى مثلا كلنا او معظمنا بيعرف يضرب افقى كويس جدااااااا لو مثلا بينشن على هدف على مسافة 25 متر
لكن لما بيقابل يمامه او اى هدف على الارض او على ارتفاع كبير بزاوية 45 مثلا وعلى مسافة 25 متر برده
بيقع فى مشكله كبييييييييييره اوى فى الضربه
لأنو بيبضرب على الهدف بنفس معايير ومقاييس الضرب على هدف افقى
وبينصدم ساعتها لما بيلاقى ان الطلقه اللى ضربها لم تصيب الهدف
بل فى بعض الاحيان بتكون بعيد عن الهدف بدرجه كبيره جدااا
وعلشان تبقى محترف وتقدر تفهم ايه المشكله بالظبط
تعالى شوف معايا ايه اللى المفروض يتعمل فى الحلات دى
الوضع الافقى اللى فى الصوره ده هو الوضع المتعارف والسليم اللى كلنا بنظبط عليه الناشنكاه اثناء تصفير الناشنكاه
بس خلى بالك ان الوضع اللى فى الصوره اللى جايه دى مش هو اللى مقصود فى الموضوع
لكن باقى الصور وباقى الاوضاع هى المقصوده
ولنقول مثلا مسافة التصفير للناشنكاه او الاسكوب كانت على 25 متر افقى
وقابلك فى الحاله دى تلات اهداف على تلات مسافات مختلفه لكن كلهم فى وضع افقى
يبقى حضرتك هاتضرب على التلات اهداف بالشكل ده
وركز كويس فى كل صوره وخلى بالك ان الخط
الخط اللى خارج من ماسورة البندقيه ده هو مسار النقطه اللى المفروض انت تضرب فيها
على مسافة 25 متر هاتضرب اسفل منتصف الهدف
على مسافة 35 هاتضرب فى اعلى جزء من الهدف
على مسافة 45 متر هاتضرب فوق الهدف بــ3 سم
الخط الخارج من الماسوره هو النقطه اللى المفروض تضرب عليها عشان الطلقه تيجى فى منتصف الهدف
[img][/img]
كلللللللللل ده معظمنا او كلنا عارفينو
...
طيب تعالى بقى ياسيدى وقوللى ياترى لو قابلت نفس التلات اهداف دول
وعلى نفس المسافات ولكن بزاويه 45 لأسفل هاتعمل ايه؟
هاتقوللى طالما على نفس المسافات يبقى هاضرب بنفس القاعده بتاعة منحنى الرمايه الافقى
هاقولك انا لا طبعا الموضوع هنا مختلف جدااااااااااااااااا
لو التلات اهداف على نفس المسافات لاكن بزاويه منحدره ( ارضيه )يبقى حضرتك تعمل الاتى
على مسافة 25 متر هاتضرب تحت الهدف بــ5 سم
على مسافة 35 متر هاتضرب تحت الهدف بـ3 سم
على مسافة 45 متر هاتضرب على اخر جزء من تحت للهدف
شوف الصوره
الخط الخارج من الماسوره هو النقطه اللى المفروض تضرب عليها عشان الطلقه تيجى فى منتصف الهدف[img][/img]
طيب لما يكون التلات اهداف على وضع رأسى بزاوية 90 ( فوق دماغك مباشرة )ياترى ايه النظام؟
هاقولك حاضر بس ماتزعقش كده
على مسافة 25 متر هاتضرب فى الجزء السفلى من الهدف ( التلت الاسفل)
على مسافة 35 متر هاتضرب تحت الهدف بـ1 سم
على مسافة 45 متر هاتضرب تحت الهدف بـ3 سم
شوف الصوره
الخط الخارج من الماسوره هو النقطه اللى المفروض تضرب عليها عشان الطلقه تيجى فى منتصف الهدف
[img][/img]
وبالنسبه للاهداف اللى بتكون مرتفعه جدا عن الارض بزاوية مثلا 45 فهايكون كالاتى
على مسافة 25 متر هاتضرب فى التلت الاعلى من الهدف
على مسافة 35 متر هاتضرب اعلى الهدف بـ2 سم
على مسافة 45 متر هاتضرب اعلى الهدف بـ 5 سم
شوف الصوره
الخط الخارج من الماسوره هو النقطه اللى المفروض تضرب عليها عشان الطلقه تيجى فى منتصف الهدف
[img][/img]
طيب لو حضرتك ناوى تجنن زى حلاتى وعاوز تصطاد سمك بالبندقيه هاتعمل ايه؟
طبعا فى الحاله دى هايكون الضرب كله فى الترع والمصارف
يعنى كل الضرب هايكون عامودى لأسفل فقط ( تحت رجلك )
والمسافات اللى هاتضرب عليها على السمك بالكتير اوى هاتكون 15 متر
يبقى على مسافة 5 متر هاتضرب فى التلت الاسفل من الهدف
على مسافة 10 متر هاتضرب تحت الهدف بـ2 سم
على مسافة 15 متر هاتضرب اسفل الهدف بـ5 سم
شوف الصوره
الخط الخارج من الماسوره هو النقطه اللى المفروض تضرب عليها عشان الطلقه تيجى فى منتصف الهدف
[img][/img]
كده تمااااااااااااا اوى
واحد هايسألنى ويقول طيب اشمعنى المسافات دى بالذات 25 و35 و45 اللى بنيت عليها حساباتك؟
هاقولك عشان دى المسافات اللى 90% من الصيادين تقريبا بيصطادو عليها طيور
واخيرا
خليك فاكر ان كل الحسابات دى معموله على اساس انك مصفر الناشنكاه او الاسكوب على 25 متر
ولو مصفر الناشنكاه على مسافه اكبر او اقل متخافش برده
الاختلاف هايكون فى نسبه بسيطه 1 او 2سنتى فى منحنى الرمايه انت اعمل حسابها فى الضرب
ونفس الكلام هاينطبق على اختلاف السرعه من بندقيه لبندقيه تانيه
لكن عموما عشان توصل لافضل النتائج لازم تتمرن بالبندقيه بتاعتك وتضرب على جميع الاوضاع اللى ذكرناها دى
ساعتها بس مش هاتحتاج تسأل حد تانى خااااااااااااالص عن اى حاجه
ملحووووووووظه
كل المعلومات والشروحات اللى انا قلتها دى مبنيه على تجارب عمليه وخبرة حوالى 15 سنه صيد
يعنى مش مجرد كلام نظرى وخلاص

الله ينور موضوع ممتاز
بانتظار المزيد